HATAW! D'yaryo ng Bayan hatawtabloid.com
NAGBABALIK-AKSIYON si Jackie Chan sa walang tigil na bakbakan sa Police Story 2013 na ipalalabas na ngayong Enero 22.
Ginagampanan ni Jackie sa Police Story 2013 ang karakter ng pulis na nagngangalang Zhong Wen. Isang matapat at masigasig na tagapagtanggol ng batas. Sa tagal n’ya sa serbisyo ay marami na rin siyang naipabilanggong kriminal na talamak sa syudad na kanyang pinagsisilbihan.
Nang isang gabing magkikita sila ng kanyang anak na babae na si Miao Miao sa isang sikat na bar na pag-aari ng kasintahan nito ay ‘di inaasahang nagkaroon ng pangho-hostage na pinangunahan ng kasintahan ng kanyang anak.
Sa una pa lamang na pagkakita ni Zhong Wen sa bar ay ‘di na niya gusto ang nakita sa loob at may kakaiba siyang kutob sa lugar. Kung kaya’t noong nagsimula na ang kaguluhan ay naipit si Zhong Wen sa sitwasyon dahil kailangan n’yang iligtas ang mga tao at pangalagaan ang anak mula sa kasintahang kasama sa sindikato.
Nang tumagal ay nalaman nila na palalayain lamang ang mga tao kung ang isang kilalang kriminal na nakakulong ay palalayain.
Sa ganitong pagkakataon ay sinamantala ng mga kalaban ni Zhong Wen ang kanyang kahinaan at lalo pang inipit sa sitwasyon na pumili sa kanyang anak o tuluyang gawin ang kanilang kondisyon na palayain ng walang banta ang kriminal.
