2 Cordillera DPWH officials sinibak sa pagkahulog sa bangin ng siklista

SINIBAK sa puwesto ang dalawang opisyal ng Department of Public Works and Highways (DPWH) sa Cordillera Region sa pagkamatay ng isang siklista sa Benguet.

Nabatid na pinalitan ni DPWH Secretary Vince Dizon sina District Engineer Isagani Cayme at Engineer Marjory Banao dahil sa pagkabigong maglagay nang sapat na road safety signages at traffic control devices, gaya ng concrete barriers, sa abandonado at gumuhong bahagi ng kalsada sa Barangay Beckel sa La Trinidad.

Posibleng ang kawalan ng warning signs at concrete barrier ang itinuturong rason kung kaya namatay ang isang 13-anyos biktima nang mahulog sa bangin.

Nagbabala si Dizon sa mga DPWH contractors na hindi tumatalima sa safety requirements sa panahon ng konstruksiyon na sila’y mahaharap sa mga kahihinatnan ng kanilang kawalan o iresponsableng mga aksiyon.

“Secretary Dizon warned that the agency’s contractors who will not enforce strict safety requirements during an ongoing construction will automatically face cancellation of contracts, blacklisting, and criminal cases,” bahagi ng pahayag ng DPWH.

Iniulat na ang gumuhong bahagi ng naturang kalsada sa Barangay Beckel ay hindi pa rin naayos simula nang mapinsala ng bagyo noong 2025.