HATAW! D'yaryo ng Bayan hatawtabloid.com
SASAILALIM sa matinding pagsubok ang Philippine national women’s football team sa pagharap laban sa Uzbekistan ngayong Huwebes sa AFC Women’s Asian Cup Australia 2026.
Nakataya sa laban ang isa sa huling dalawang puwesto para sa 2027 FIFA Women’s World Cup na pinagtatalunan ng apat na natitirang koponan sa play-in stage ng torneo.
Ayon kay national coach Mark Torcaso, handa na ang koponan para sa hamon. Aniya, malaking tagumpay na marating nila ang puntong ito, ngunit may mas mataas pa silang layunin.
Gaganapin ang laban dakong 11:00 ng umaga (oras sa Maynila) sa Cbus Super Stadium sa Gold Coast.
Napunta ang Filipinas sa play-in round matapos ang mabigat na 0-7 pagkatalo sa Japan sa quarterfinals. Samantala, ang Uzbekistan ay galing din sa 0-6 kabiguan kontra South Korea sa Sydney.
Sa kabila nito, determinado ang White Wolves na makabawi at makapasok sa World Cup, ayon sa kanilang coach na si Kotryna Kulbyte.
Sa head-to-head records, lamang ang Uzbekistan matapos manalo sa tatlo sa kanilang huling apat na laban kontra Filipinas, habang nagtapos sa 2-2 tabla ang kanilang friendly match noong Oktubre sa Rizal Memorial Stadium.
Inaasahang ilalaban ng Filipinas ang kanilang pinakamalakas na lineup, kabilang ang beteranang goalkeeper na si Olivia McDaniel na nakapagpahinga sa nakaraang laro, habang si Chandler McDaniel ang aasahang manguna sa opensa.
Para sa Uzbekistan, posibleng gamitin ang kanilang pangunahing manlalaro na sina Lyudmilla Karachik, Maftuna Shoyimova, at Nilufar Kudratova na hindi gaanong naglaro sa nakaraang laban.
Abangan din si Diyorakhon Khabibullaeva na nakapagtala ng dalawang goal laban sa Filipinas sa kanilang huling pagtatagpo—isang malinaw na banta sa depensa ng Filipinas. (PSC/HNT)
