HATAW! D'yaryo ng Bayan hatawtabloid.com
GOLD COAST, Queensland – Kailangang masungkit ng Filipinas ang panalo laban sa Iran upang manatiling buhay ang kanilang tsansa na makapasok sa playoffs ng AFC Women’s Asian Cup 2026.
Ito ay matapos silang yumuko sa South Korea, 0-3, noong Huwebes sa Cbus Super Stadium sa Robina, na naging ikalawang sunod na pagkatalo ng Philippine women’s national football team sa Group A.
Ayon kay national coach Mark Torcaso, bagama’t nadismaya sila sa naging resulta ng laban kontra Korea, kinakailangan nang ituon ng koponan ang kanilang atensyon sa susunod na laro laban sa Iran sa Linggo.
Aniya, mahalagang makabawi ang Filipinas upang mapanatili ang kanilang pag-asa na makapasok sa susunod na yugto ng torneo.
Ang unang dalawang koponan mula sa bawat isa sa tatlong grupo ang awtomatikong makakapasok sa playoffs. Samantala, ang dalawang pinakamahusay na third-placed teams sa group stage ang kukumpleto sa quarterfinal cast.
Sa kasalukuyan, magkasalo sa liderato ng Group A ang South Korea at host Australia na kapwa may 2-0 rekord. Nauna nang sinelyuhan ng Australian Matildas ang kanilang puwesto sa quarterfinals matapos tambakan ang Iran, 4-0, sa harap ng halos punong istadyum.
Samantala, nakakuha na rin ng puwesto sa susunod na yugto ang North Korea sa Group B matapos ang kanilang ikalawang sunod na panalo laban sa Bangladesh, 5-0, sa Sydney. Patuloy namang pinaglalabanan ng Japan at Vietnam ang kanilang kapalaran sa Group C sa Perth.
Sa ngayon, nakikipagsabayan ang Pilipinas sa India at Uzbekistan para sa posibleng puwesto bilang isa sa pinakamahusay na third-placed teams. Natalo ang India sa Vietnam, 1-2, habang sinusubukan pa ng Uzbekistan na makabawi matapos ang kanilang 0-3 pagkatalo sa North Korea.
Dahil dito, hindi lamang panalo ang kailangan ng Filipinas laban sa Iranian Lionesses, kundi pati mas magandang goal difference kumpara sa iba pang koponang nakikipaglaban para sa huling puwesto sa playoffs.
Iginiit naman ni Torcaso na nananatiling buo ang determinasyon ng mga manlalaro na makausad sa torneo at muling makabalik sa World Cup stage.
Dagdag pa niya, habang mas nagkakaroon ng exposure ang koponan sa malalaking torneo at internasyonal na kompetisyon, lalo pang humuhusay ang kanilang kakayahan bilang mga manlalaro.
Sa huling laban sa group stage, inaasahang babalik sa aksiyon ang beteranang midfielder na si Jacklyn Sawicki matapos ang ankle injury na natamo niya sa training.
Pinagpahinga siya ni Torcaso sa laban kontra South Korea bilang pag-iingat, kung saan ipinasok ang mas batang manlalaro na si Isabella Pasion sa midfield.
Ayon sa coach, mahalagang bahagi ng koponan si Sawicki kaya’t minabuti nilang tiyaking ganap siyang makarekober bago muling isabak sa laro.
Samantala, nagkaroon din ng pansin sa Iranian women’s team ang mga naganap na protesta sa labas ng stadium na nagpapahayag ng suporta sa mga manlalaro.
Maghaharap naman ang Australia at South Korea sa Linggo upang matukoy kung sino ang mangunguna sa Group A. (PSC/HNT)
