Jean Garcia kaagapay ng RDR Prod

PUSH NA’YAN
ni Ambet Nabus

INANUNSIYO ng RDR Productions, gumagawa ng mga film, socmed stories, at ilan pang gamit ang Artificial Intelligence na kapartner nila ang mahusay na kontrabidang si Jean Garcia.

Sa upcoming Kontrabida Talks series, bibigyan nila ng pansin ang pagiging primera kontrabida ni Jean at makakaharap at hahamunin ang mga gaya nina Gladys Reyes, Archie Alemania, Sassa Girl at ilan pang kilalang vloggers sa socmed.

Sey ng founder ng RDR na si Reymond “Boss RDR” delos Reyes, bukod sa business solutions, online presence and content at media appearances, nais din nilang palaguin ang AI content via advertisement para sa mga entrepreneur, OFWs at mga business owner na sumasabay sa takbo ng technology sa buong mundo.

Aware rin siyang naabuso ang A.I. kaya’t may panwagan din siya sa mga mambabatas na magawan sana ng batas o mga batas na pwedeng mag-regulate rito.

“Roon na talaga kasi tayo papunta. Hindi na iyan maiiwasan kaya’t dapat sabayan ng may tamang mga patakaran. Basta kami, we are always for the content o laman ng istorya at tamang message na nais iparating sa mga consumer or end users,” dagdag nito.

Kaya nga involve pa rin sila sa mga content gaya ng Kontrabida Talks dahil bahagi pa rin ng mga programa nila ang film at online content na may legit and reliable star gaya ni Jean.