HATAW! D'yaryo ng Bayan hatawtabloid.com
INILUNSAD ni Philippine Olympic Committee (POC) President Abraham “Bambol” Tolentino, ang isang bagong palaro na inaasahang makikinabang hindi lamang ang mga atletang Filipino kundi maging ang mga kabataang atleta mula sa iba’t ibang bansa sa Asya sa ginanap na press conference nitong Lunes sa PSC Media Center sa Rizal Memorial Sports Complex (RMSC) sa Malate, Maynila.
Tinawag itong SEA Plus Youth Games (SEA Plus YG), isang bagong multi-sport event sa rehiyon na lalahukan ng mga batang atleta mula sa 11 bansa sa Southeast Asia kasama ang 12 inimbitahang bansa mula sa Asya.
Ang Filipinas ang magsisilbing host ng kompetisyon na gaganapin mula 2 hanggang 14 Disyembre sa 2027 sa New Clark City, Subic, Maynila, at Tagaytay.
Itinalaga ni Philippine Olympic Committee (POC) President Bambol Tolentino si Philippine Sports Commission (PSC) Chairman Patrick “Pato” Gregorio bilang pinuno ng Local Organizing Committee ng SEA Plus Youth Games (PHILSEAP YGOC), para sa kauna-unahang edisyon ng palaro para sa mga atletang may edad 16 anyos pababa (U16).
Aabot sa 20 sports ang tampok sa SEA Plus Youth Games kabilang ang Athletics at Aquatics (mandatory sports), Triathlon, Judo, Boxing, Golf, Taekwondo, Skateboarding, Wrestling, Fencing, Basketball, Tennis at Gymnastics (Olympic sports); Jiu-jitsu, Billiards, MMA at Dancesport (non-Olympic sports); at Arnis bilang tradisyonal na isport.
Ayon kay Tolentino, layunin ng naturang palaro na mabigyan ng mas maraming oportunidad ang mga batang atleta upang magkaroon ng mas malawak na exposure habang pinaghahandaan ang mas malalaking kompetisyon sa rehiyon at sa buong mundo.
Ipinaliwanag niya, sa kasalukuyan, ang mga batang atleta ng bansa ay karaniwang nagmumula lamang sa mga kompetisyong tulad ng Palarong Pambansa at Batang Pinoy bago sumabak sa Asian Youth Games.
Aniya, magsisilbing tulay ang SEA Plus YG upang mas maihanda ang mga atleta bago sila lumahok sa mas mataas na antas ng kompetisyon.
Binigyang-diin ni Tolentino na magsisilbi itong mahalagang paghahanda para sa Asian Youth Games at sa kalaunan ay sa Youth Olympic Games. (POC/HNT)
