PH, Magho-host ng Kauna-unahang U19 Asian Sepak Takraw Championship

MANILA — Nakatakdang mag-host ang Pilipinas ng kauna-unahang U19 Asian Sepak Takraw Championship mula Nobyembre 18 hanggang 25 sa makasaysayang Rizal Memorial Coliseum sa Maynila.

Tinatayang mahigit 600 atleta mula sa 12 hanggang 16 bansa ang lalahok sa torneo na magtatampok ng mga kategoryang regu, quad, at mixed quadrant.

Ayon kay Karen Caballero, pangulo ng Pilipinas Sepak Takraw, malaking karangalan para sa bansa ang mapagkatiwalaan sa pagho-host ng nasabing paligsahan.

“Malaki at espesyal ito para sa amin dahil ipinagmamalaki namin ang bawat pagkakataong makapag-host ng ganitong prestihiyosong torneo,” pahayag ni Caballero sa isinagawang press conference sa Rizal Memorial Sports Complex sa Maynila.

Dumalo rin sa naturang pagtitipon sina Philippine Sports Commission chairperson John Patrick Gregorio at commissioner Walter Torres, gayundin si Asian Sepak Takraw Federation deputy secretary general Muhammad Fariq.

Hinimok naman ni Gregorio ang patuloy na pagsusulong ng sepak takraw sa bansa.

“Kung may pagkakataon tayong makatulong sa pagpapalaganap ng sepak takraw, dapat natin itong gawin,” aniya.

Matatandaang sinuportahan ng PSC ang matagumpay na pagdaraos ng bansa ng iba pang malalaking international sporting events noong nakaraang taon.

Samantala, iginiit ni Fariq na ang torneo ay magsisilbing simula ng mas maaliwalas na kinabukasan para sa mga kabataang atleta.

“Isa itong mahalagang hakbang tungo sa paghubog ng mga susunod na superstar,” aniya. (HNT)