HATAW! D'yaryo ng Bayan hatawtabloid.com
NAARESTO ng mga awtoridad ang isang babaeng nakatala bilang ‘Other Wanted Person’ para sa kasong estafa sa bisa ng warrant of arrest sa bayan ng Bulakan, lalawigan ng Bulacan, nitong Sabado, 14 Pebrero.
Ayon sa ulat ni P/Lt. Col. Rodelisa San Bunaventura, hepe ng Bulakan MPS, kinilala ang suspek na si alyas Ann, 45 anyos, residente sa Brgy. Bambang, sa nabanggit na bayan.
Dinakip ang suspek ng tracker team ng Bulakan MPS sa bisa ng warrant of arrest para sa kasong estafa na nilagdaan ni Presiding Judge Ma. Peaches C. Mesina-Cruz ng Rosario, Cavite MTC, may petsang 3 Pebrero, 2026.
Kasalukuyan nang nasa kustodiya ng Bulakan MPS ang suspek para sa kaukulang dokumentasyon at disposisyon bago ito i-turnover sa hukuman na naglabas ng warrant para sa pag-isyu ng commitment order.
Pahayag ni P/Col. Angel Garcillano, provincial director ng Bulacan PPO, patuloy ang pinaigting na operasyon ng pulisya laban sa mga indibiduwal na may kinahaharap na kaso upang matiyak na sila ay mapanagot sa batas at mapanatili ang kaayusan sa komunidad. (MICKA BAUTISTA)
