Tirador ng mga karinderya sa Bulacan
HOLDAPER NAPERDE SA TUGIS NG PULIS

MATAGUMPAY na naaresto ng mga awtoridad ang isang lalaking pinaniniwalaang tirador ng mga karinderya sa operasyong isinagawa sa bayan ng Pandi, lalawigan ng Bulacan, nitong Lunes, 9 Pebrero.

Ayon sa ulat ni P/Lt. Col. Sean Logronio, acting chief of police ng Pandi MPS, kinilala ang naarestong suspek na si alyas Mar, 45 anyos, residente sa Barangay Bagong Barrio, sa nabanggit na bayan.

Batay sa imbestigasyon, pumasok ang suspek sa isang karinderya at nagdeklara ng holdap, saka tinangay ang cellphone at cash ng biktima.

Samantala, habang nagsasagawa ng anti-illegal gambling operation ang mga intel operatives ng Pandi MPS sa nasabing lugar ay napansin nila ang komosyon sa naturang establisimiyento kaya agad silang nagresponde.

Tumakas ang suspek ngunit matapos ang mabilis na pagtugis ng mga operatiba ay naaresto at nabawi ang mga tinangay na gamit, kabilang ang cellphone at pera ng biktima.

Narekober din mula sa suspek ang isang replica ng baril na Springfield Armory 1911 A1 cal. .45 at isang kulay pulang Mitsukoshi MC na dinala sa Pandi MPS para sa wastong disposisyon.

Inihahanda na ang kasong Robbery/Holdup at paglabag sa RA 10591 laban sa suspek para sa pagsasampa sa Prosecutor’s Office sa Malolos City.

Kasalukuyang nasa kustodiya ng Pandi MPS ang naarestong suspek na sinasabing notoryus sa panghoholdap ng mga karinderya sa Pandi at iba pang bayan sa Bulacan. (MICKA BAUTISTA)