Parang kendi lang kung magbenta ng shabu sa kalye, 2 tulak nakalawit

DALAWANG personalidad na kabilang sa isinasangkot sa droga ang naaresto ng mga awtoridad sa ikinasang buy-bust operation sa Brgy. Camias, San Miguel, Bulacan.

Batay sa ulat ng San Miguel MPS sa pangunguna ni PLt. Colonel Voltaire C. Rivera, OIC, kinilala ang mga suspek na sina alyas “Undo,” 32 anyos, residente ng Brgy. Partida, San Miguel at alyas “Charo,” 47 anyos, residente ng San Antonio, Nueva Ecija, kapuwa nasa street level target list.

Naaresto ang dalawang suspek sa operasyon ng kontra droga matapos magbenta ng hinihinalang shabu sa operatiba na nagpanggap na poseur buyer.

Nasamsam mula sa mga suspek ang kabuuang labindalawang sachet ng hinihinalang shabu na may timbang na humigit-kumulang 5 gramo at may standard drug price na Php 34,000; isang marked money; isang Caliber .45 pistol na may serial number 236515; isang magazine; at apat na bala ng cal. 45.

Napag-alaman na ang dalawang suspek ay lantaran kung magbenta ng shabu na kahit sa kalye ay parang kendi lamang na inilalako ang mga ito sa kanilang mga kliyenteng adik.

Ang dalawang naarestong suspek at ang nakumpiskang ebidensya ay dinala sa Bulacan PFU para sa drug test at kaukulang laboratory examination.

Sa pahayag ni PColonel Angel Garcillano, provincial director ng Bulacan PPO ay muling pinatunayan ng mga operatiba na walang takas ang sino mang sangkot sa iligal na droga at mga armadong kriminal sa lalawigan. (MICKA BAUTISTA)