Nartatez tumutok sa mga operasyon paglipas ng bagyo

MABILIS na tinutukan ni Acting Chief PNP Lt. Gen. Jose Melencio C. Nartatez Jr., ang PNP Command Center (PCC) ngayong Lunes ng umaga upang pangunahan ang pagsubaybay sa mga operasyon ng pulisya at mga hakbang sa pagtugon sa mga lugar na naapektohan ng bagyo.

Kasama si Police Colonel Ramon Pranada, hepe ng PCC, sinuri ni Lt. Gen. Nartatez ang mga ulat mula sa iba’t ibang rehiyon at mga yunit ng pulis na kasalukuyang nakatalaga sa mga apektadong komunidad. Ipinamalas ng kanilang pagbisita ang dedikasyon ng pamunuan ng PNP sa patuloy na pagbabantay at pagtitiyak na ang mga operasyon para sa relief, rehabilitasyon, at seguridad ay maayos na isinasagawa at nakatuon sa kapakanan ng publiko.

Pamumunong aktibo at mapagkalinga

Sa kaniyang pagbisita, nakipag ugnayan si Lt. Gen. Nartatez sa mga tauhang naka-duty upang alamin ang mga pinakahuling ulat at magbigay ng mga tagubilin para mapanatili ang maayos na koordinasyon sa mga lokal na pamahalaan, pambansang ahensiya at mga responder.

Binigyang diin niya ang kahalagahan ng patuloy na kahandaan kahit nakalampas na ang bagyo at ipinaalala na ang tunay na pamumuno ay hindi lamang nasusukat sa panahon ng krisis kundi sa tuloy-tuloy na pagtulong sa panahon ng pagbangon.

Ipinunto niya na ang epektibong pamumuno sa ganitong mga pagkakataon ay nangangailangan ng disiplina at malasakit, mga katangiang patuloy na ipinamamalas ng PNP sa kanilang serbisyo sa publiko.

Serbisyong may puso at pagkakaisa

Patuloy na nakahanda ang PNP sa pagtulong sa mga operasyon ng relief, clearing, at rehabilitasyon sa mga lugar na tinamaan ng Uwan. Sa 24/7 operasyon ng Command Center, tuloy-tuloy ang pakikipag ugnayan ng mga yunit sa field upang tiyakin ang kaligtasan, tulungan ang mga evacuee na makabalik sa kanilang mga tahanan, at mapabilis ang pagbabalik sa normal na pamumuhay.

Ang pagbisita ni Lt. Gen. Nartatez ay sumasalamin sa pamumunong may malasakit at pagkilos, paalala na ang tunay na paglilingkod sa bayan ay hindi nagtatapos kapag lumipas ang unos kundi nagpapatuloy hangga’t may mga  nangangailangan ng tulong.(BONG SON)