HATAW! D'yaryo ng Bayan hatawtabloid.com
VIVA! Napanatili ng Italy ang kanilang titulo sa FIVB Men’s Volleyball World Championship matapos ang matinding panalo laban sa Bulgaria sa Final (FIVB MWCH 2025 LOC)
Muling nasungkit ng Italy ang kampeonato sa FIVB Volleyball Men’s World Championship sa ikalawang sunod na pagkakataon, matapos nilang pataubin ang Bulgaria sa iskor na 25-21, 25-17, 17-25, 25-10 sa harap ng mahigit 16,000 manonood sa Mall of Asia Arena.
Kung may mga pagdududa pa sa kanilang dominasyon—lalo na matapos ang malinis na panalo kontra world No. 1 at matinding karibal na Poland sa semifinals—kinailangan lang ng mga Italyano ng 96 minuto upang ipakita ang kanilang paghahari laban sa world No. 9 Bulgaria sa 32-team tournament, ang pinakamalaki sa kasaysayan ng kompetisyon.
Ito na ang ikalimang titulo ng Italy sa kabuuan, ang pinakamarami sa mga kasalukuyang bansa, at pumapangalawa lamang sa dating Soviet Union na may anim na titulo.
Ngunit higit pa sa bilang, itinatag ng Italy—na ngayon ay back-to-back champions—ang kanilang sarili para sa isa pang panahon ng pamamayani, matapos na rin nilang maging kauna-unahang bansa na nagwagi ng tatlong sunod na titulo noong dekada 1990.
Naulit ito ng Brazil noong maagang bahagi ng 2010s.
Pinangunahan ni Yuri Romano, na tinanghal na Best Opposite Spiker, ang Italy sa kanyang kamangha-manghang 22 puntos, kabilang ang limang sunod-sunod na service aces sa ikalawang set. Dinala niya ang kanyang koponan sa rurok ng men’s volleyball sa Maynila, kasunod ng kanilang pagkapanalo noong 2022 na co-hosted ng Poland at Slovenia.
Nag-ambag din sina Mattia Bottolo at Alessandro Michieletto ng 19 at 12 puntos, ayon sa pagkakabanggit, habang si playmaker Simone Giannelli ay may apat na bonus points mula sa dalawang atake at dalawang block, bukod pa sa kanyang 36 assists.
Si libero Fabio Balaso ay nagtala ng siyam na digs at dalawang receptions.
Apat na manlalaro mula sa Italy ang napasama sa 2025 FIVB MWCH Dream Team. Si Michieletto ay itinanghal bilang Best Outside Hitter at Most Valuable Player, si Romano ay Best Opposite Spiker, habang sina Giannelli at Balaso ay Best Setter at Best Libero, ayon sa pagkakabanggit.
Nakapasok din sa Dream Team sina Aleksandar Nikolov ng Bulgaria (Best Outside Hitter), Aleks Grozdanov ng Bulgaria, at Jacub Kochanowski ng Poland bilang Best Middle Blockers.
“Alam namin na kailangan namin ng isa pang perpektong laro laban sa Bulgaria pagkatapos ng perpektong laro kontra Poland. Maaaring mas maganda ang laro namin laban sa Poland kaysa sa finals, pero hindi na mahalaga ‘yon. Ang mahalaga ngayon ay ang gintong medalya,” sabi ni Michieletto.
“Napakaespesyal ng pakiramdam na maging two-time world champion. Masaya ako at lubos na nagpapasalamat. Wala akong masabi para ilarawan ang nararamdaman namin.”
“Simula nang dumating kami rito, patuloy kaming nag-improve sa buong torneo. Hindi madali ang manalo ng isang championship, at ngayon ay dalawa na. Sa tingin ko, mas matamis pa itong pangalawa,” dagdag pa ni team captain Giannelli.
Nagsimula ang Italy sa group phase sa pamamagitan ng isang hindi inaasahang pagkatalo kontra Belgium, pero bumawi ito sa pamamagitan ng malaking 25-21, 25-22, 25-23 sweep laban sa VNL champion na Poland, na siyang nagbigay sa kanila ng momentum papunta sa finals.
Ang Bulgaria, na tinaguriang “dark horse” ng torneo, ay lumaban at nakuha ang ikatlong set. Ngunit determinado ang Italy, at nagtapos ito sa pamamagitan ng matinding 25-10 panalo sa ikaapat na set, na nagpasabog ng kasiyahan sa mga Pinoy na tagahanga.
Tumapos ng 23 at 11 puntos sina Aleksandar Nikolov at Martin Atanasov para sa Bulgaria, habang nagtapos ang kanilang makasaysayang Cinderella run.
Mas maaga, nakuha ng Poland ang bronze medal matapos talunin ang world No. 18 na Czechia sa iskor na 25-18, 23-25, 25-22, 25-21.
Pinangunahan ni Wilfredo Leon ang Poland sa kanyang 26 puntos, habang si Kewin Sasak ay may 11 puntos.
Para sa Czechia, sina Lukas Vasina at Patrik Indra ay nagtala ng 19 at 11 puntos, bilang pagtatapos sa isang kahanga-hangang Final Four finish. (FIVB Media)
