P38-K kita ng tindahan sinikwat ng empleyado

INARESTO ng mga awtoridad ang isang lalaki matapos tangayin ang kita ng tindahang pinagtatrabahuan sa bayan ng Norzagaray, lalawigan ng Bulacan, nitong Linggo, 21 Setyembre.

Ayon sa ulat na ipinadala ni P/Lt. Col. Ismael Gauna, acting chief of police ng Norzagaray MPS, kay P/Col. Angel Garcillano, provincial director ng Bulacan PPO, kinilala ang nadakip na suspek na si alyas Jester, 30 anyos, residente sa Brgy. Minuyan, sa lungsod ng San Jose del Monte.

Sinabi sa ulat na nang magpasukan ang mga empleyado dakong 8:00 ng umaga kamakalawa ay nadiskubre nilang wasak ang vault ng kanilang tindahan.

Agad nilang ipinaalam sa 56-anyos ay-ari na siyang nagkompirmang nawawala ang P38,000 cash sa loob ng vault.

Sa pagsusuri ng CCTV footage ng barangay hall, nakita ang suspek na pumasok sa establisimiyento at ninakawan ito bandang 3:40 ng madaling araw.

Agad humingi ng tulong ang biktima sa duty patroller na si P/Cpl. Joseph Ryan Villareal na nagresulta sa pagkakaaresto sa suspek at pagkabawi ng bahagi ng nakaw na pera na nagkakahalaga ng P32,000.

Kasalukuyang nasa kustodiya ng Norzagaray MPS ang suspek habang inihahanda ang kaukulang kaso laban sa kanya. (MICKA BAUTISTA)