10 lalaki sa Sparks Camp maghahasik ng kilig

SHOWBIZ KONEK
ni Maricris Valdez

MAGHAHASIK muli ng kilig ang 10 lalaking kalahok sa Sparks Camp, unang queer dating reality show sa bansa. 

Level-up ang kanilang kilig sa ikatlong season mula sa pagsasama-sama ng sampung lalaki sa bundok para maghanap ng pag-ibig. Ito’y mapapanood simula Hulyo 16 (Miyerkoles) sa bago nitong tahanan sa ABS-CBN Entertainment YouTube channel.

Bukod sa inaabangang bagong grupo ng campers na maghahatid ng kilig, tampok din sa Sparks Campseason 3 ang bago nitong lokasyon sa naggagandahang mga bundok at ang nakaka-LSS na theme song na Nahuhulog na kinanta ng dating The Voice Teens PH season 1 finalist na si Chie.

Nagbabalik bilang host si ‘Mother Sparker’ Mela Habijan at ang direktor na si Theodore Boborol na kilig overload ang hatid sa programa dahil sasabak sa iba’t ibang masasayang dating games ang mga camper upang mahanap ang kani-kanilang ‘mutual spark.’ 

Matapos ipasilip sa social media ang sampung bagong camper, ngayon pa lang ay kanya-kanyang komento ang netizens sa pinupusuan nilang camper. Makikilala ang advertising executive na si Joer Reyes, content creator na si Edward Maalihan, brand strategist na si Kim Bejerano, performing artist na si Harold Espiritu, piloto na si Andrew Rabin, podcaster na si Julian Agustin, flight attendant na si Khali Empleo, graduate student na si Aaron Aberasturi, professional wrestler na si Julio Dragon Silvestre, at marketer na si Ants Pedregosa.

Handog din ng bagong season ang mas pinakilig na aminan at rebelasyon ng mga camper dahil available sa buong mundo ang special director’s cut para sa Super Kapamilya members sa ABS-CBN Entertainment YouTube at kapag nag-subscribe sa iWant.

Simula noong nag-premiere ang Sparks Camp, pumatok ito sa mga manonood sa Pilipinas pati na rin sa labas ng bansa kabilang ang USA, Canada, Middle East, at India dahil sa pagtampok ng iba’t ibang karanasan ng LGBTQIA+ community. 

Nagtala rin ito ng pinagsama-samang mahigit pitong milyong digital views sa YouTube para sa seasons 1 at 2 at nakasungkit ang programa ng nominasyon para sa Best Original Reality and/or Competition Programme sa 2024 ContentAsia Awards.