Luis buhay na buhay, pagpanaw fakenews

MA at PA
ni Rommel Placente

ANG ibang mga netizen talaga, walang magawa sa buhay kundi ang magpakalat ng fake news.

Trending ngayon ang TV host na si Luis Manzano na umano’y ipinagluluksa matapos ang biglaang pagpanaw.

Maraming Facebook pages ang nagkakalat ngayon na patay na raw ang panganay ni Vilma Santos na may mga kalakip pang mga larawan ng pagdala umano sa ospital pati na rin ang larawang nakahiga ito sa isang kabaong.

Iba-iba ang caption ng mga post, ang ilan ay nagsasabing nagdadalamhati ngayon ang dating aktres at asawa ni Luis na si Jessy Mendiola.

Mayroon ding umiiyak ang ina nitong si Vilma at sinabing lumaban daw ang anak sa kabila ng mga pangyayari.

May mga post pa ngang sumuko na raw ang ama ni Luis na si Edu Manzano na may kinalaman daw sa pagkamatay ng anak dahil sa pera.

Obviously ay fake news lamang ang mga ito dahil buhay na buhay si Luis.

Katunayan, active ito sa kanyang social media pages at nagbabalik sa kanyang pagbabahagi ng mga funny video clip at memes.

Kaka-post pa nga lang ni Luis ng mga picture ng manggang hilaw with bagoong.

Chika niya sa caption, “Saraaaaaap!!! Pag kinain ko to cannibalism labas.”

Matagal na ang pagpo-post ni Luis ng mga memes sa social media at natigil lamang nang nangampanya ito at tumakbo sa pagkabise gobernador ng Batangas noong midterm elections.