Jeep tumaob sa Talisay, Negros Occidental 11 pasahero sugatan

SUGATAN ang 11 katao, kabilang ang limang menor de edad, nang tumaob ang sinasakyan nilang jeep sa Sitio Mambucano, Brgy. Cabatangan, sa lungsod ng Talisay, lalawigan ng Negros Occidental nitong Lunes ng umaga, 19 Mayo.

Ayon sa ulat ni P/Maj. Rhazl Jim Jocson, deputy chief ng Talisay CPS, nagkaroon ng problema sa makina ang jeep habang binabagtas paakyat ang pakurbang kalsada.

Nawalan umano ng kontrol ang 49-anyos driver ng jeep dahilan upang ito ay umatras at tumagilid.

Dagdag ni Jocson, bigong maayos na makapagpalit ng gear sa kambiyo ang driver habang umaakyat sa kalsada.

Agad nilapatan ng paunang lunas ang lahat ng biktima saka dinala ang tatlo sa pagamutan na pinauwi din kalaunan.

Samantala, ligtas ang driver ng jeep at kasalukuyang nasa kustodiya ng pulisya habang hinihintay ang desisyon ng mga biktima kung siya ay sasampahan ng kaso.

Nabatid na magkakamag-anak ang mga pasahero mula sa Pulupandan, Negros Occidental at nirentahan ang jeep para sa kanilang outing sa Talisay.