HATAW! D'yaryo ng Bayan hatawtabloid.com
NAHAHARAP sa patong-patong na kaso sa Tanggapan ng Ombudsman sina Mangatarem, Pangasinan Mayor Ramil Ventenilla, Vice Mayor Michael Mon Rosette Punzal, at municipal accountant Kenaz Bautista batay sa reklamo ni Ricardo Bachar Luciano, Jr., isang taxpayer sa nasabing munisipyo.
Kabilang sa kasong isinampa laban sa tatlo ay malversation of public funds, misappropriation with consent, negligence, technical malversation, paglabag sa local government code na may kaugnayan sa tax rules, paglabag sa government accounting manual code ng Filipinas, paglabag sa procurement law, at paglabag sa code of ethical conduct of the public officers.
Batay sa nilalaman ng reklamo at mga ebedensiyang isinumite ni Luciano sa Ombudsman, nabigo ang mga respondents na pansinin ang rekomendasyon ng Commission on Audit (COA) sa loob ng 2020 hanggang 2023 na papanagutin ang taong nabigong ideposito ang kaban ng bayan sa banko at sa halip ay nilustay ito.
Sinabi ni Luciano ang kawalang aksiyon ng tatlo ay nagresulta ng maramihang pagkawala ng pera sa kaban ng bayan.
Tinukoy ni Luciano na maging ang program of work para sa konstruksiyon ng General Services Office (GSO) building at warehouse na mayroong kontratang P1,998,030.87 ay hindi man lamang napapakibangan at nagagamit sa loob ng mahigit isang taon na.
Hindi kasi kombinsido si Luciano na hindi alam ng tatlong inaakusahan niya ang ginagawang hakbangin ni Municipal Officer in Charge Treasurer Alex Carpio ukol sa kaban ng bayan gayong ito ay bahagi ng kanilang command responsibility.
Ipinunto ni Luciano ang kapangyarihan ng mga respondent na tiyaking ang pera o kaban ng bayan ay nagagamit nang tama para sa nararapat paggamitan bagay na nabigo nilang gawin.
Lumalabas din sa hawak na dokumento ni Luciano na umaabot sa halos P19 milyon ang several disallowances at audit suspensions nang hindi pa rin maipaliwanag hanggang sa kasalukuyan mula sa taong 2020 hanggang 2023.
Batay sa mga hawak na ebedensiya ni Luciano lumalabas na hindi nagdeposito sa banko para sa kaban ng bayan, nagkaroon ng shortage at over statements ang mga proyekto at pondo ng mga opisyal.
Tinukoy ni Luciano na noong taong 2020 ay hindi naipamahagi ang parte ng mga barangay sa Real Property Tax (RPT) na umabot sa P4,161,904.26.
Ipinagtataka ni Luciano kung paanong nangyari na ang kuwenta sa mga business taxes ng munisipyo ng Mangatarem ay mas mababa pa sa actual gross receipts na hindi akma sa Local Revenue Code ng mga LGU na nagresulta sa under assessment at under collection ng business taxes na umabot sa P233,825.28.
