HATAW! D'yaryo ng Bayan hatawtabloid.com
Iginiit ng AKO—OFW partylist na mas kinakailangan ng bansa ang OFW remittances sa kabila ng paglabas ng perang puhunan ng mga foreign investors sa bansa.
Ayon sa Banko Sentral ng Pilipinas ay patuloy ang paglabas ng Foregn Capital sa ating bansa simula pa noong Enero na umaabot na sa $283.69 milyon.
Kung kaya, nakikita naman ni AKOOFW Partylist 1st nominee Dr.Chie Umandap ang kahalagahan ng paglago ng OFW Remitances para matapatan ang paglabas ng dolyar ng mga foreign investors.
Ang “OFW remittances” ay ang perang ipinapadala ng mga OFW (Overseas Filipino Workers) sa kanilang mga pamilya o mahal sa buhay sa Pilipinas.
Ayon kay 1st nominee at AKO- OFW chairman Dr. Chie Umandap na dati ring overseas filipino worker sa Kuwait, malaki ang papel ng mga overseas filipino worker (OFW) sa pagpapalago ng ating ekonomiya.
Kung kaya dapat lamang na mabigyan sila ng pamahalaan ng kaaya-ayang benepisyo tulad ng OFW-Pension plan, OFW-Discount, OFW-Pabahay at marami pang iba.
Binigyang diin ni Dr. Umandap, na hindi sapat na bansagan lamang ng gobyerno na “Bagong Bayani” ang mga OFW bagkus dapat ay ipadama sa kanila ang tunay na malasakit hindi lamang tuwing may namamatay at nagte-trending na mga kaso at pangaabuso sa mga OFW.
Dapat aniya na maramdaman din ng mga OFW na hindi namaltrato o namatay ang tunay na pagma-malasakit ng ating gobyerno kung hindi ano ba ang buhay na naghihintay sa kanila matapos ang ilang taong pagtatrabaho sa ibang bansa.
Sa datos ng BSP ang gross inflows ay lumago ng 6.8% o $1.31 bilyon noong Enero mula sa $1.24 bilyon sa parehong buwan noong 2024. Mas mataas ito ng 25% kaysa sa $1.06 bilyon noong Disyembre 2024.
Samantala, ang remittances naman mula Enero hanggang Nobyembre 2024 ay umabot sa $34.61 bilyon o katumbas ng P1.83 trillion
na nagpapakita ng 3.0% pagtaas kumpara sa $33.59 bilyon o katumbas ng P1.79 trillion na naitala noong parehong panahon noong 2023.
