HATAW! D'yaryo ng Bayan hatawtabloid.com
NAGBABALA si Senador Sherwin “Win” Gatchalian sa ilang probisyon ng panukalang paunlarin ang industriya ng natural gas sa bansa dahil maaari itong makasama sa kapakanan ng taongbayan.
Binigyang-diin ni Gatchalian na bagama’t kinikilala niya ang magandang hangarin ng Senate Bill 2793 o ang An Act Promoting The Development Of The Philippine Natural Gas Industry upang makamit ang seguridad sa enerhiya at mahikayat ang pamumuhunan sa sektor ng upstream oil and gas, kailangan aniyang muling bisitahin at suriin ang ilang mga probisyon.
Partikular na binanggit ng senador ang Section 6 ng naturang panukala, na nagpapahintulot ng full recovery ng mga ‘reasonable cost’ ng mga power generator – isang mas maluwag na pamantayan kompara sa ‘least cost’ na kinakailangang nakasaad sa Electric Power Industry Reform Act (EPIRA).
Idinagdag ng senador, dapat tiyakin ng panukalang batas na mapoprotektahan pa rin ng Energy Regulatory Commission (ERC) ang mga konsumer sa pamamagitan ng ‘least cost standard’ kapag sinusuri ang mga kasunduan sa power supply.
Sa probisyon ng supply ng gas na nasa Section 21, mas prayoridad ang indigenous natural gas (ING) kaysa imported na natural na gas at maging ang elektrisidad mula sa ING ay mas prayoridad sa generation, transmission, distribution, at supply, kahit na mas mahal ang ING kaysa ibang supply.
Maaari umano itong magdala ng problema dahil mapipilitan ang mga mamimili na magbayad nang mas mataas na presyo ng koryente tuwing mas mahal ang ING.
Ayon sa industry sources, ang halaga ng purong liquified natural gas (LNG) sa 10.5 US dollars kada million British thermal units (MMBtu) ay tugma sa levelized cost of energy (LCOE) rate na P7.07 kada kilowatt hour (kWh).
Sa kabilang banda, ang halo LNG at indigenous natural gas (ING), ay may presyo mula 11.8 hanggang 13.5 MMBtu, ay katumbas ng rate na P8.4 kada kWh.
“Kailangan nating seguradohin na ang bawat probisyon ng panukalang batas ay magbibigay ng proteksiyon sa mga konsumer at magpapalakas ng buong sektor ng enerhiya para lalong palakasin ang ating ekonomiya,” ani Gatchalian. (NIÑO ACLAN)
