Sa ELYU  
PILOTO, PASAHERO SUGATAN SA BUMAGSAK NA CESSNA PLANE

ni Niño Aclan

BUENAS na maituturing dahil minor injury lang ang napala ng dalawang sakay ng Cessna plane, isang piloto at isang pasahero, nang bumagsak sa dagat matapos mag-take-off sa San Fernando Airport sa La Union.

Base sa inisyal na impormasyon, ang nasabing aircraft na may registered number RP-C6923 ay nag-take-off sa Runway 19 ng San Fernando Airport nang bigla itong mag-crash sa baybayin ng Barangay Canacay, San Fernando, La Union.

Agad nagresponde ang mga rescuers mula sa Philippine Coast Guard (PCG) matapos makompirma ng San Fernando tower ang insidente.

Isinugod sa ospital ang mga biktima na sakay ng bumagsak na training aircraft na pag-aari ng Leading Edge International Training Aviation Academy, Inc. (LEIAAI) center.

Sa ngayon, patuloy na nagsasagawa ng imbestigasyon ang mga tauhan ng Civil Aviation Authority of the Philippines (CAAP) investigators and inquiry board upang matukoy ang naging sanhi ng pagbagsak ng naturang eroplano.