Rabiya handang ipaglaban si Jeric, deadma sa mga negang balita

MA at PA
ni Rommel Placente

KUNG ang ibang showbiz couples ay inaalam ang password ng cell phone ng bawat isa, para malaman/mabisto kung ano ang ginagawang kalokohan, never ginawa ito nina Jeric Gonzales at Rabiya Mateo kahit pa matagal-tagal na rin silang magkarelasyon.

‘Yun ang sinabi ni Rabiya sa guesting niya sa Fast Talk With Boy Abunda.

May tiwala naman daw kasi sila sa bawat isa kaya hindi issue sa kanila kung bawal makialam sa kanilang mga gamit na cellphone.

“Dati I have access, we both have access sa phones namin. Ngayon wala na, kasi we trust each other na,” pag-amin ni Rabiya kay kuya Boy.

Sabi pa ni Rabiya, kahit masasabing nagsisimula pa lamang ang love story nila ni Jeric, nakapag-build na sila kahit paano ng foundation sa kanilang relationship.

Natanong naman ni kuya Boy si Rabiya kung ano ang kanyang kondisyon para tapusin o tuldukan na ang isang relasyon.

“Siguro kapag hindi na ako mahal. Sa actions, Tito Boy.

“Kapag wala na ‘yung respeto and at the same time, ‘pag mas okay na ‘yung hindi kayo nag-uusap kaysa pinag-uusapan niyo,” dugtong ng dalaga.

Pero handa siyang ipaglaban ang lalaki kung mayroon pa siyang nararamdamang pagmamahal kahit kaunti.

“Pero kung wala na, kahit mahal ko pa siya, let go na,” esplika pa ni Rabiya.

Nauna rito, inamin din ng dalaga na totoong naaapektuhan siya noon sa mga sinasabi ng mga tao laban kay Jeric dahil hindi niya alam kung ano talaga ang kanyang paniniwalaan.

“First time kong mag-date ng celebrity and minsan kapag celebrity din ‘yung idine-date mo ang daming opinyon, ang daming sinasabi about him and at first, I was shaken about it.

“Parang hindi ko alam kung paniniwalaan ko ba ‘yung sinasabi ni Jeric o ‘yung sinasabi ng mga tao about him kasi ibang-iba, eh,” aniya pa.

Ngunit sa kabila ng lahat ng kanegahang ibinabato sa aktor, mas pinili pa rin niyang maniwala at pagkatiwalaan si Jeric. Ibig sabihin, mas nanaig talaga ang pagmamahal niya sa boyfriend.