HATAW! D'yaryo ng Bayan hatawtabloid.com
NASA mahigit P.3 milyong halaga ng shabu ang nakompiska ng pulisya sa dalawang bagong identified drug pushers (IDPs) matapos kumagat sa buybust operation sa Malabon City, kamakalawa ng gabi.
Kinilala ni Malabon police chief P/Col. Jay Baybayan ang naarestong mga suspek na sina Allan Gapate, alyas Putol, 33 anyos, (HVI) ng Blk 10 Lot 51 Phase 2 Area 3, Brgy. Longos; at Clyde Drexler Nunag alyas Drex, 27 anyos, delivery rider ng Nepomuceno St., Velazques, Tondo, Manila.
Sa ulat ni Col. Baybayan kay Northern Police District (NPD) Director P/BGen. Rizalito Gapas, nakatanggap ng impormasyon ang mga operatiba ng Station Drug Enforcement Unit (SDEU) ng Malabon police hinggil sa sinabing pagbebenta ng shabu ni Gapate sa lungsod kaya isinailalim nila ito sa validation.
Matapos makompirma ang ulat, ikinasa ng mga operatiba ng SDEU ang buybust operation sa pamamagitan ng isang pulis na nagpanggap na buyer ang nagawang makipagtransaksiyon kay Gapate ng P2,500 halaga ng shabu.
Nang tanggapin ni Gapate ang marked money mula sa pulis poseur-buyer kapalit ng isang plastic sachet ng shabu ay agad siyang dinakma ng mga operatiba, kasama ang kanyang kasabwat na si Nunag sa Dulong Proper Borromeo St., Brgy. Longos, dakong 11:00 pm.
Ani Col. Baybayan, nasamsam sa mga suspek ang halos P354,280 halaga ng hinihinalang shabu at isang tunay na P500 bill, kasama ang dalawang P1,000 boodle money na ginamit bilang buybust money.
Mahaharap ang mga suspek sa kasong paglabag sa RA 9165 o ang Comprehensive Dangerous Drug Act of 2002. (ROMMEL SALES)
