HATAW! D'yaryo ng Bayan hatawtabloid.com
MA at PA
ni Rommel Placente
MARAMI ang may gustong malaman, lalo na ang mga Marites, kung ano ba talaga ang tunay na dahilan kung bakit naghiwalay sina McCoy de Leon at Elisse Joson.
Ayon kay McCoy, walang third party sa hiwalayan nila ni Elisse.
Sagot niya ito sa sinasabing ang TikTok personality na si Mary Joy Santiago ang bago niyang karelasyon.
Si Ogie Diaz, gusto ring malaman ang tunay na dahilan kung bakit nagkanya-kanya na ng landas sina McCoy at Elisse.
At dahil malapit niyang kaibigan ang daddy ni McCoy na si Mark, tinext niya ito para alamin kung bakit nakipaghiwalay ang anak kay Elisse.
Sa reply ni Mark kay Ogie, humingi ito ng paumanhin dahil hindi pa siya makapagbibigay ng komento sa hiwalayan ng dalawa. Pero hiyang-hiya umano ito sa nangyari.
Text back ni Mark kay Ogie, “Pasensya na boss Ogs, sa ngayon hindi po ako makakapagsalita.
“Hiyang-hiya ako sa nangyari, pasensiya na po.”
At least ang daddy Mark ni McCoy, no comment sa paghihiwalay nina McCoy at Elisse. Hindi katulad ni Rey Abellana, na ikinuwento kung bakit naghiwalay noon ang anak na si Carla Abellana at Tom Rodriguez. Na naging dahilan para magalit si Carla sa kanya, ‘di ba?
