4 babaeng menor de edad na ibinubugaw, nasagip

NASAGIP ng mga awtoridad ang apat na kabataang babae na ibinubugaw para sa serbisyong seksuwal sa mga kalalakihan sa Baliwag, Bulacan kamakalawa.

Sa ulat na ipinadala ni P/Lt.Colonel Julius Alvaro, acting chief of police ng Baliwag Municipal Police Station (MPS), kay P/Col. Relly B. Arnedo, officer-in-charge ng Bulacan PPO, ang magkasanib na entrapment at rescue operation ay ikinasa ng Regional Anti-Trafficking in Person Task Group (RATTG3), RWCP, mga tauhan ng RIDND, WCPD Baliwag MPS, at Bulacan PPO katuwang ang DSWD Bulacan sa Brgy. Sta. Barbara, Baliwag dakong 5:00 pm.

Ang operasyon ay nagresulta sa pagkakasagip ng apat na kababaihan pawang menor de edad, habang naaresto ang tumatayong bugaw na isang 16-anyos residente sa San Roque, Baliwag, Bulacan.

Napag-alamang ang mga nabanggit na operating team ay nagposte ng poseur customers na nagbayad para sa apat na kabataang babae gamit ang markadong boodle money bilang kabayaran sa serbisyong seksuwal.

Matapos masagip, ang apat na menor de edad ay dinala sa Camp Olivas, Lungsod ng San Fernando, Pampanga pati na rin ang 16-anyos suspek para sa nararapat na disposisyon ng kaso. (MICKA BAUTISTA)