Fetus ibinalot sa plastic

BIGLANG NAGKAGULO ang limang kabataang naglalaro, nang makakita sila ng isang patay na sanggol na nakasilid sa isang plastic bag sa Navotas City kamakalawa ng hapon.

Sa ulat ni P/SSgt. Reysie Peñaranda, dakong 4:10 pm, masayang naglalaro ang mga batang mag-aaral sa Brgy. San Rafael Village, nang makatawag sa kanilang pansin ang isang plastic bag na may tatak ng isang bantog na department store sa kanto ng Encarnacion at Francisco streets.

Nagkaisa ang mga bata na bulatlatin ang plastic bag at dito sila pare-parehong nagimbal nang makita sa loob ng plastic bag ang may dugo pang fetus.

Kaagad sumugod sa San Rafael Village Barangay Hall ang mga bata upang ipabatid sa mga opisyal ng barangay ang natuklasan, na sila namang nagparating sa kaalaman ng pulisya.

Hiniling ng pulisya sa barangay ang kuha ng kanilang mga close circuit television (CCTV) camera sa naturang lugar matapos ang pakikipag-ugnayan sa Navotas City Action Command Center at sa Navotas City Health Office sa pagbabakasakaling matunton kung sino ang nagtapon ng patay na sanggol sa nasabing lugar. (ROMMEL SALES)