Ogie na-shock sa ina ng 3 buwang anak: Alagaan mo siya at gawing Liza

SHOWBIZ KONEK
ni Maricris Valdez Nicasio

TAWANG-TAWA kami sa ikinuwento ni Ogie Diaz noong Miyerkoles ng gabi nang makahuntahan namin ito at kulitin ukol sa umalis na alagang si Liza Soberano. Naikuwento ni Ogie na bagamat umalis sa kanya si Liza maraming mga magulang ang nagpupunta sa kanya para ang kanilang mga anak ay gawing tulad ni Liza. 

Ang Nakakalurkey. May dinala sa kanyang 3 mos old na baby at sinabing gawing ‘Liza Soberano’. O ‘di ba naman? Kaya hagalpakan kami sa katatawa. Jusme eh dinala sa kanya si Liza 12-anyos na.

It only shows kung gaano ka-effective na manager si Ogie kaya kahit nawala sa kanya si Liza eh, marami pa rin ang nagtitiwala na mapasisikat niya ang mga dinadala sa kanya para alagaan.

Ukol naman sa paglipat ni Liza kay James Reid, wala namang sama ng loob si Ogie  sa dating alaga maging sa bagong manager ng dalaga. 

Esplika ni Ogie, nagpaalam nang maayos sa kanya si Liza kaya hangad niya na magtagumpay ito sa inaasam na Hollywood career.

Natanong si Ogie kung kinausap ba siya ni James sa paglipat ni Liza sa kanya. Ang naging tugon ng komedyante/vlogger ay hindi. Pero okey lang iyon sa kanya at walang problema iyon.

Katwiran niya, mas magkakaroon ng problema kung close niya si James at hindi man lang siya kinausap.

“Okay lang. Siyempre, nasa tao naman ‘yun kung gustong magpaalam. Kung hindi, wala rin namang problema. Walang kaso sa akin,” ani Ogie.

Sinabi pa ni Ogie na okey naman si James at matagal nang magkakaibigan ang apat— James at Liza kasama sina Nadine Lustre at Enrique Gil.

Kaya nga ‘yung nag-uugnay kina Liza at James iginiit ni Ogie na napaka-imposible dahil bukod sa matagal nang magkaibigan ang dalawa, sina Liza at Enrique pa rin. Walang katotohanan na nag-break na ang dalawa.

Sinabi pa ni Ogie na hindi ganoong klaseng babae si Liza na kaagad pumapatol sa lalaki.