HATAW! D'yaryo ng Bayan hatawtabloid.com
ARESTADO ang apat na hinihinalang mga tulak ng ilegal na droga sa serye ng buy bust operations na ikinasa ng mga awtoridad sa lalawigan ng Laguna nitong Lunes, 6 Hunyo.
Iniulat ni Laguna PPO Acting Provincial Director, P/Col. Cecilio Ison, Jr., kay PRO-4A PNP Regional Director, P/BGen. Antonio Yarra, ang pagkakaaresto sa apat na drug suspects sa mga lungsod ng Calamba at San Pedro, at sa bayan ng Sta. Cruz.
Nadakip ng Calamba CPS sa ilalim ng direktang pangangasiwa ni P/Lt. Col. Arnel Pagulayan ang suspek na kinilalang si Jeffrey De Guzman, 36 anyos, walang trabaho, at residente sa Brgy. 2, Calamba, dakong 6:26 pm nitong Lunes, 6 Hunyo, sa nabanggit na lugar, na nagbebenta ng ilegal na droga sa poseur buyer kapalit ng P500.
Nakompiska mula sa suspek ang anim na plastic sachet ng hinihinalang shabu, tinatayang may 1.3 gramo at nagkakahalaga ng P8,840; coin purse na may lamang P300 pesos; at P500 bill na ginamit bilang buy bust money .
Sa magkahiwalay na operasyon ng pulisya ng Calamba CPS, nasukol ang suspek na si Chen David Capacio, 27 anyos, helper, at residente sa Brgy. 2, Calamba, dakong 8:43 pm kamakalawa, sa Elepaño 1 Subdivison, Brgy. 3, nagbebenta ng ilegal na droga sa pulis na nagsilbing poseur buyer kapalit ng P500.
Nasamsam mula sa suspek ang anim na pirasong plastic sachet na naglalaman ng hinihinalang shabu na tinatayang may timbang na 1.1 gramo at tinatayang nagkakahalaga ng P8,160; isang coin purse na may lamang P350, at P500 ginamit bilang buy bust money.
Gayondin, nadakip ng mga tauhan ng San Pablo CPS sa ilalim ng direktang pangangasiwa ni P/Lt. Col. Garry Alegre, ang mga suspek na kinilalang sina John Marco Baldovino, 30 anyos, call center agent; at Roy Umali, 31 anyos, online tutor, at kapwa mga residente ng Brgy. San Gregorio, San Pablo, dakong 6:00 pm nitong Lunes, 6 Hunyo, sa Bria Homes, Brgy. San Gregorio, na nagbebenta ng ilegal na droga sa pulis na nagsilbing poseur buyer kapalit ng P500.
Nakompiska mula sa mga suspek ang apat na piraso ng plastic sachet, naglalaman ng hinihinalang shabu na tinatayang nagkakahalaga ng P2,000, isang coin purse na may lamang P300, at P500 buy bust money.
Samantala, nakorner ng Sta. Cruz MPS sa ilalim ng direktang pangangasiwa ni P/Lt. Col. Paterno Domondon, Jr., ang suspek na kinilalang si Marilyn Banaag, 47 anyos, residente sa Brgy. Santisima Cruz, Laguna dakong 8:45 pm kamakalawa, sa Sitio Yakal, Brgy. Santisima Cruz, na nagbebenta ng ilegal na droga sa poseur buyer kapalit ng P500.
Nakompiska sa suspek ang pitong plastic sachet na naglalaman ng hinihinalang shabu, nagkakahalaga ng P6,800; isang pirasong coin purse at P500 na ginamit bilang buy bust money.
Nasa kustodiya ng pulisya ng kani-kanilang operating unit ang mga naarestong suspek at nakatakdang sampahan ng kasong paglabag sa RA 9165 o Comprehensive Dangerous Drugs Act of 2002, samantalang isusumite ang mga nakuhang ebidensiya sa Crime Laboratory Office para sa forensic examination.
Pahayag ni P/BGen. Antonio Yarra, “Ipagpapatuloy namin ang pagpuksa sa ilegal na droga sa lahat ng paraan. Hinihimok ko ang mga tao na aktibong lumahok sa ating kampanya laban sa ilegal na droga upang mailigtas ang kanilang mga pamilya sa mga krimen na maaaring gawin ng mga personalidad na sangkot sa droga.” (BOY PALATINO)
