MWP ng Aurora tiklo sa Pasay

INARESTO ng mga awtoridad ang pang-apat na most wanted person sa lalawigan ng Aurora sa isinagawang manhunt operation sa lungsod ng Pasay, nitong Biyernes ng tanghali, 19 Nobyembre.

Sa ulat mula kay P/Col. Julio Lizardo, acting provincial director ng Aurora PPO, naglatag ang mga elemento ng Counter Intelligence Division-IG, Maria Aurora MPS, Aurora PPO, Pasay CPS, SPD, NCRPO at Bongabon MPS ng manhunt operation sa bahagi ng Pasay City Sport Complex.

Sa ikinasang operasyon, nadakip ang target na kinilalang si Rolando Nava, laborer, tubong Brgy. San Jose, Maria Aurora, sa nabanggit na lalawigan.

Inaresto si Nava sa bisa ng warrant of arrest para sa krimeng apat na bilang ng Forcible Abduction at Rape kaugnay sa RA 7610 na nilagdaan ni Presiding Judge Maximo Ancheta, Jr., ng Baler RTC Branch 90, may petsang 15 Disyembre 2017, walang itinakdang piyansa.

Samantala, pinapurihan ni PRO3 Regional Director P/BGen. Matthew Baccay ang operating troops na dumakip sa akusado at ipinagdiinang pananagutin siya sa ginawang krimen.

 (MICKA BAUTISTA)