Most Wanted ng Nueva Ecija nasukol sa Batangas

NADAKIP ng mga awtoridad ang isang lalaking pinaghahanap sa kasong frustrated murder sa Nueva Ecija sa kanyang pinagtataguan sa lalawigan ng Batangas nitong Miyerkoles ng gabi, 25 Agosto.

Ayon kay P/Col. Rhoderick Campo, OIC provincial director ng Nueva Ecija PPO, nagkasa ng manhunt operation ang magkasanib na mga elemento ng San Antonio Municipal Police Station sa Nueva Ecija  at Sto. Tomas CPS, sa lungsod ng Sto. Tomas, lalawigan ng Batangas.

Target ng operasyon ang puganteng kinilalang si Michael Gabriel, nakatala bilang top 10 most wanted person ng San Antonio, Nueva Ecija, 40 anyos, na nadakip sa bisa ng Warrant of Arrest sa krimeng Frustrated Murder na nilagdan ni Presiding Judge Thelma Canlas Trinidad-Pe Aguirre, ng Caloocan City RTC Branch 129, may petsang 3 Nobyembre 2015.

Lumilitaw sa datos, si Gabriel ay suspek sa pananaksak sa kanyang kasamahan sa trabaho noong 2014 at nagtago ng mahigit limang taon bago naaresto sa Batangas. (MICKA BAUTISTA)