HATAW! D'yaryo ng Bayan hatawtabloid.com
NAGPOSITIBO sa CoVid19 si Manila Mayor Francisco “Isko Moreno” Domagoso.
Kinompirma ito ng Manila Public Information Office kahapon.
Agad dinala si Moreno sa Sta. Ana Hospital matapos lumabas ang resulta ng kanyang RT-PCR test.
“Nakararamdam ako ng kaunting ubo, kaunting sipon. Masakit ang aking katawan ngayon,” ani Moreno sa isang kalatas.
Tiniyak ng alkalde na hindi mauudlot ang operasyon at pagsusumikap ng lungsod laban sa CoVid-19.
“Kapit lang. Tuloy ang buhay. Tuloy pa rin ang gobyerno sa Maynila. Umasa tayo, magtiwala tayo sa Diyos, makararaos din tayo,” sabi niya.
Kahit CoVid-19 positive, si Moreno pa rin ang timon ng siyudad at sa pagtugon sa pandemya.
Nauna rito ay nagpositibo rin sa CoVid-19 si Manila Vice Mayor Honey Lacuna noong 8 Agosto. (ROSE NOVENARIO)
