HATAW! D'yaryo ng Bayan hatawtabloid.com
NAKALIGTAS si dating Camarines Sur 1st District Representative Rolando Andaya sa tangkang pamamaslang sa Brgy. Palestina, Bayan ng Pili, sa lalawigan ng Camarines Sur, nitong Martes ng umaga, 1 Hunyo.
Ayon sa tagapagsalita ng PRO-5 PNP na si P/Maj. Malu Calubaquib, sakay si Andaya ng Toyota Land Cruiser nang paulanan ng bala ng mga suspek na sakay ng motorsiklo sa kahabaan ng Maharlika Highway, sa nabanggit na lugar.
Narekober mula sa pinangyarihan ng insidente ang dalawang basyo ng kalibre .45 baril.
Nabatid na hindi tinamaan ng bala si Andaya at ang kanyang mga kasamahan sa insidente ng pamamaril.
Samantala, agad nag-utos si P/BGen. Jonnel Estomo ng imbestigasyon ukol sa pananambang.
“Tayo po ang nag-deploy ng karagdagan pulis sa lugar upang alisin ang pangamba ng mga kababayan na naroon. Makaaasa po kayo na kami ay makipagtutulungan sa mga witnesses at mga local government official ng Camarines Sur upang mapabilis ang pagtukoy at pagresolba sa insidenteng ito,” pahayag ni Estomo.
