Mother Lily, ibinalik ng guard nang magtangkang lumabas ng bahay

MASAYANG-MASAYA si Mother Lily Monteverde sa kanyang zoom birthday conference dahil maraming celebrities ang bumati sa kanya. Star studded nga, ‘ika namin kahit may pandemic.

Bumati kay Mother ang mga artistang sina Judy Ann Santos, Ricky Davao, Enchong Dee, Ritz Azul, Lovi Poe, ang mag-asawang Gary Valenciano at Angeli Pangilinan at mga kaibigan niya in and out of  showbiz.

Masiglang-masigla si Mother kaya naman masaya niyang pinagbigyan ang kahilingan ng mga ka-zoom na tumugtog siya ng piano na biro niya’y ‘yun at ‘yun din naman ang piyesang tinutugtog niya.

Eighty one na si Mother na ang wish ay, “Good health at gusto kong umabot ng 100 years.”

Ka-zoom din ni Mother ng oras na iyon si Direk Joey Reyes na panay ang tanong niya kung kailan sila magsisimulang mag-shooting. Sagot ng magaling na director, ‘umpisa na tayo! Ang dami ko ng pelikulang gagawin.’

 

Ayon kay Mother, hindi na siya nakalabas ng kanilang bahay simula nang mag-lockdown dahil ayaw siyang palabasin ng mga anak kahit mag-grocery lang.

“Minsan akong lumabas sa gate, ibinalik ako ng guard. Ha-hahaha!” tawa ng tawang kuwento ng Regal producer.

Nang tanungin ang Regal Matriarch ukol sa kung paano niya ipo-promote ang entry nila sa Metro Manila Film Festival 2020? Sagot nito, “Hindi ko alam, tuloy ba ang Metro Manila Film Festival?. Entry ng Regal ang Ang Mga Kaibigan ni Mama Susan na pagbibidahan ni Joshua Garcia.

“Parang ang hirap. Nag-postpone nga ulit ang theater owners sa opening nila. Sa tingin n’yo kailan babalik ang normal? Next year na ‘no? Next year na siguro ang MMFF” susog naman ni Roselle Monteverde na siyang abala sa zoom conference noong hapong iyon.

 

SHOWBIZ KONEK
ni Maricris Valdez Nicasio