HATAW! D'yaryo ng Bayan hatawtabloid.com
PARA sa mga nagagalit o hindi maintindihan ang mga kababayan nating patuloy at walang takot na nagpapahayag ng kanilang kritisismo sa kalagayan ng buong bansa sa panahon ng pandemya, huwag po ninyo silang personalin.
Sa totoo lang po, ang mga kritikong ‘yan ang nagsasatinig ng ating mga hinaing sa panahon ng pandemya na hindi nakikitaan ang pamahalaan ng siyentipiko at estratehikong hakbang upang wakasan ang pandemyang CoVid-19.
Nakalulungkot mang sabihin, bigo ang pamahalaan sa sinasabi nilang ‘pagpatag sa kurbada’ ng pandemya kahit nagpakawala ng P275 bilyon mula sa kaban ng bayan at US$5.8 bilyong foreign loans.
At ‘yang US$5.8 bilyong foreign loans na ‘yan ay babayaran nating lahat hanggang sa mga kaapo-apohan natin.
Kaya huwag tayong mangiming magsalita kung sa tingin natin ay makatutulong naman tayo gaya ngayong dumaraing na ang maraming medical frontliners.
Huwag kalimutan na may bilang ang mga boses natin.
Hindi nakapanghihinayang mangutang kung nai-address nang tama o kahit malapit-lapit man lang sa katatohanan ang paglaban natin sa CoVid-19.
Pero por Dios po Santo, limang buwan nang hindi nagbabago ang sitwasyon at palala nang palala, wala pa rin tayong naaaninaw na maayos na resulta…
Mismong medical frontliners ang nagsasabi na mayroong problema sa approach o sa sistema (kung may sistema ngang ginagawa para wakasan ang salot na ito) ng ahensiyang nakatalaga o namumuno para i-address ito dahil hindi nababawasan ang mga pasyenteng dinadala sa kanila.
Sabi nga ng isang medical frontliner, “Dati po kapag gumaling ang isang pasyente nakapagpapahinga kami, ngayon po, hindi pa gumagaling ang isang pasyente, may tatlo o limang kasunod na.”
E ano nga naman ang kahulugan nito?
Ibig sabihin lalong lumalala ang sitwasyon.
Banner story na po tayo sa The Strait News ng Singapore. Tayo na ang South East Asia’s coronavirus hot spot.
Tsk tsk tsk…
Talaga bang hihintayin na lang ng gobyernong ito ang pagdating ng ‘bakuna’ na hindi pa rin natin sigurado kung epektibo at walang side effect sa ating kalusugan?!
Kung ganyan po ang ating sitwasyon, aba, tayo na po ang mag-alaga sa ating mga sarili. Magtakda ng protocol sa buong pamilya. Panatilihing malinis ang kamay, laging maghugas. Huwag kalilimutang magsuot ng face mask at face shield kung lalabas ng bahay. Kumain ng masusustansiyang pagkain, uminom ng mga garantisadong supplements at bitamina. Gumawa ng daily exercises sa loob ng bahay dahil hindi nga puwedeng lumabas.
Huwag lumabas ng bahay kung hindi naman kailangan. At iwasang ma-depressed upang hndi humina ang immune system.
Mahaba pa po ang laban kaya ang pakiusap lang po ng ating health workers and medical frontliners, alagaan ang ating mga sarili upang hindi na tayo makadagdag sa mga kababayan nating kailangang gamutin.
Alagaan ang sarili hindi para sa sarili lang, kundi para sa pamilya, sa kapwa, sa mga napapagal nating medical frontliners, at para sa bayan.
Let’s go!
