Andrei nahulog, nabalian  

SOBRANG nag-alala si Aiko Melendez sa panganay niyang si Andrei Yllana dahil nabaliwan ng buto nitong weekend sanhi ng pagkakahulog sa hagdanan.

Kuwento ni Aiko sa amin kahapon, “nagte-text po kasi, hindi namalayan ‘yung isang steps, hayun nahulog, natakot ako, siyempre. Kaya hayan naka-cast siya for a month.”

Hirap kumilos ang binata dahil kanang kamay ang nadale, “oo kaya hirap siyang kumilos, pati sa pagda-drive hirap, pero hindi ko siyempre hahayaan.”

Binati kasi namin si Aiko kahapon ng Happy Father’s Day dahil naging ama’t ina siya sa dalawang anak niyang sina Andrei at Marthena Jickain at nabanggit nga niya na nahulog ang anak.

Nagpadala ng steak si Andrei bilang father’s day gift sa papa niyang si Jomari Yllana at pinag-grab dahil nga hindi siya makapagmaneho para personal sanang iabot sa ama.

Sabi namin na ang sweet ni Andrei sa tatay niya, “oo ate, mahal na mahal ni Andrei ang tatay niya.”

Nakatatawang tsika pa ni Aiko, “hindi makasulat si Andrei kasi nga right hand ang bali, ako pinasusulat ng letter, sabi ko, ‘ikaw na, alam ng tatay mo ang sulat ko, ha, ha, ha.’”

Wala namang ipinadala ang bunsong si Marthena sa amang si Martin Jickain dahil nasa Boracay siya kasama ang pamilya pero binati naman ng bagets ang ama.

Anyway, wala pa ring balita si Aiko kung kailan ang balik-taping nila ng Prima donnas sa GMA, “sabi July, eh, wala pa naman akong natatanggap na call slip o balita. Kaya nganga muna ako, ate ha, ha, ha, enjoyin ko lang ‘tong Gadgets All in One.”

FACT SHEET
ni Reggee Bonoan