Misis sinapak, binantaang papatayin, Mister deretso sa hoyo

SA KULUNGAN bumagsak ng isang 37-anyos driver matapos sapakin at pagbantaan na papatayin ang kanyang asawa makaraan ang kanilang mainitang pagtatalo sa Valenzuela City, kamakalawa ng gabi.

Kinilala ni Valenzuela Police chief P/Col. Fernando Ortega ang suspek na si Randy Dechaca, residente sa Anneth 1, Brgy. Marulas na nahaharap sa kasong physical injury at grave threat in relation to RA 9262 o Violence Against Women and their Children Act.

Batay sa ulat, dakong 10:30 pm, kinompronta ni Jena, 39, ang kanyang mister sa loob ng kanilang bahay nang madiskubreng nakikipagrelasyon sa ibang babae kaya nauwi sa pagtatalo.

Sa kainitan ng pagtatalo, sinapak ng suspek sa ulo ang biktima saka kumuha ng gunting at pinagbantaang saksakin ang asawa ngunit tinangkang makipag-agawan ng ginang na naging dahilan upang masugatan ang kanang kamay.

Matapos ito, nagawang makatakbo ng biktima palabas ng kanilang bahay at humingi ng tulong sa Valenzuela Police Community Precinct (PCP)-3 na nagresulta sa pagkakaaresto sa suspek. (ROMMEL SALES)