HATAW! D'yaryo ng Bayan hatawtabloid.com
MATAPOS ang mahigit tatlong taon ay balik tambalan sina Kim Chiu at Xian Lim sa “Love Thy Woman” na mapapanood na simula 10 Pebrero sa Kapamilya Gold.
At sa grand mediacon ng bagong teleserye ng Dreamscape Entertainment ay pinuri ng isa sa director ng serye na si Jerry Lopez Sineneng si Kim na napahanga raw siya sa performance na ibinigay ng actress sa eksenang kinunan.
Ibig sabihin ay mas lalo pang nag-level-up ang acting ni Kim sa pinagbibidahang Love Thy Woman na isang family drama na iikot kay Adam Wong na gagampanan ng multi-awarded actor na si Christopher de Leon, ama ni Kim sa soap.
Dalawang pamilya ang maglalaban para sa pag-ibig sa pinakabagong teleserye na star-studded cast na kinabibilangan rin nina Eula Valdes, Sunshine Cruz, Zsazsa Padilla, at Ruffa Gutierrez.
Ito ay istorya ng isang modernong Filipino-Chinese family na pinamumunuan ng amang si Adam (Christopher) na ang hangad ay mahalin nang pantay ang dalawa niyang pamilya – ang unang asawang si Lucy (Eula) at anak nilang si Dana (Yam), at ang pangalawang asawang si Kai (Sunshine) at anak niya ritong si Jia (Kim).
Kahit na tanggap ng dalawang asawa ang sitwasyon, patuloy pa rin ang alitan sa pagitan nila at maaapektohan nito ang relasyon ng kanilang mga anak.
Isang gabi ang wawasak sa pamilyang Wong dahil maaaksidente si Dana at ang asawa niyang si David (Xian) sa gabi ng kanilang kasal, at malalagay sa coma si Dana. Habang hinihintay nilang magising si Dana, mabububuo naman ang mas malalim na relasyon sa pagitan nina Jia at David na gugulo sa kanilang buong angkan.
Anong mga tagpo ang maghihintay sa paggising ni Dana? Hanggang kailan kayang pumagitna ni Adam sa pagsasama ng dalawa niyang pamilya? Ang “Love Thy Woman” ay mula sa direksiyon nina Jeffrey Jeturian, Andoy Ranay, at Jerry Lopez Sineneng.
Mapapanood din dito sina Jana Victoria, Jennifer Sevilla, Chienna Filomena, China Yoo, David Chua, Shido Roxas, Tim Yap, Kimberly Tan, Mari Kaimo, Tori Garcia, Turs Daza, at Karl Gabriel.
Panoorin ang “Love Thy Woman” ngayong Feb 10 sa ABS-CBN at ABS-CBN HD. Para sa updates, pumunta lamang sa abscbnpr.com at i-follow ang @abscbnpr sa Facebook, Twitter, at Instagram.
VONGGANG CHIKA!
ni Peter Ledesma
