Kitkat, makakasama na ng Dabarkads

MASAYANG ibinalita ni Kitkat Favia na naoperahan na ang daddy niya nitong Sabado dahil hirap maka-ihi.

Habang tinitipa namin ang balitang ito ay kinumusta namin ang tatay ng komedyana, ”5AM (Sabado) naoperahan mga before 11AM po lumabas sa recovery room.”

Sabay padala ng litrato ni Kitkat na naka thumbs-up ang ama habang nakahiga sa kama ay naka-suwero.

Kasalukuyang nasa Bacolod si Kitkat habang ka-chat namin dahil nag-show at kagabi dumating na diretso naman sa launching niya kasama ang ibang endorsers ng Emcore Dotnet sa MetroTent Metrowalk, Pasig City.

Pero bago naman lumipad ng Bacolod si Kitkat ay sinigurado niyang okay na ang ama, nalagyan ng dextrose at iba pa.

“Siyempre po, worried ako kasi nasa Bacolod ako,” saad ni Kitkat.

At dahil alam ni God na kailangan ng aktres ng panggastos ay may offer sa kanya ang Eat Bulaga na hindi naman direct competitor ng ABS-CBN na naka-kontrata si Kitkat sa Star Magic.

“Minsan lang naman ako lalabas sa ‘Eat Bulaga’ at ipinagpapaalam ko naman ito sa bosses ng ABS, naiintindihan naman nila ako kasi wala rin naman akong regular show pa sa kanila,” pangangatwiran ni Kat.

Tinanong namin kung sakaling alukin siyang maging regular sa EB, ”ay hindi ko po alam, ha ha ha.”

FACT SHEET
ni Reggee Bonoan