HATAW! D'yaryo ng Bayan hatawtabloid.com
INARESTO si dating Foreign Affairs secretary at dating Securities and Exchange Commission chairman, Perfecto Yasay Jr., ng mga pulis-Maynila alinsunod sa warrant of arrest na inilabas ng Manila Regional Trial Court (MRTRC).
Sa ulat ng MPD-PIO, 3:00 pm kahapon nang dakpin si Yasay sa kanyang bahay sa Milano Residences, Century City Road, Barangay Poblacion, Makati City.
Kasalukuyang nakakulong si Yasay sa Manila Police District (MPD) sa Criminal Investigation and Detection Unit (CIDU).
Bago ang pag-aresto, lumutang sa tanggapan ng CIDU si Atty. John Irvin Velasquez, kinatawan ng Bangko Sentral ng Pilipinas at humiling ng police assistance upang maisilbi ang wrrant laban sa 73-anyos na si Yasay.
Sa record ng kaso, si Yasay kasama ang limang iba pa, ay inakusahang nagsabwatan upang makapangutang ng P350,000,000 sa Banco Filipino para sa Tierrasud Incorporated na ginagarantiyahan ng real properties na pag-aari ng Tropical Land Corporation.
Nang makuha ang salaping inutang hindi ini-report ng mga akusado ang naturang loan na naganap noong 2001 hanggang 2009.
Ayon kay Yasay, ang warrant of arrest laban sa kaniya ay kaugnay ng mga kasong kriminal laban sa mga opisyal ng nagsarang Banco Filipino dahil umano sa mga pagmamalabis bilang bank officials mula 2003-2006.
Ani Yasay, na hindi siya magpipiyansa, at mananatili siya sa kulungan, hanggang hindi niya nakakaharap ang hukom ng Branch 10 ng Manila Regional Trial Court na naglabas ng warrant, upang kuwestiyonin ang umano’y kawalan ng katarungan sa pagkakasangkot niya sa kaso dahil pumasok siya sa Banco Filipino noon lamang 2009, o tatlong taon matapos ang umano’y pagmamalabis ng mga opisyales ng banko.
“To all my friends, allow me to inform you that I am now being arrested from my house by police officers of Manila on the basis of a warrant of arrest issued by the RTC of Manila Branch 10 for criminal charges that were alleged committed by officials of Banco Filipino from 2003 to 2006, clearly appearing on the face of the Information filed by the prosecutor, when in truth and in fact I joined the Bank only in 2009. I am not posting bail until I am brought before the judge where I will question this abuse of process and travesty of justice,” pahayag ni Yasay sa kanyang Facebook account.
“Please include me in you prayers for my deliverance,” panawagan ni Yasay.
HATAW News Team
