Megan, isinugod sa ospital dahil sa ‘emergency’

ANO kayang nangyari kay Megan Young at isinugod siya sa ospital kahapon ng madaling araw kaya hindi nakadalo sa mediacon ng bago nilang serye nina Rayver Cruz at Kris Bernal na Hanggang Sa Dulo ng Buhay Ko (Lunes).

Sitsit ng aming source, may ‘emergency’ si Megan kaya wala siya sa mediacon at maging ang buong staff din ng programa ay inaalam pa kung ano ang sakit ng dalaga.

Mag-asawa ang papel nina Rayver at Megan sa serye at si Kris ang ka-love triangle na may twist.

Ang seryeng Dragon Lady ni Janine Gutierrez na magtatapos na sa Hulyo 20 ay papalitan ng serye nina Rayvera t Megan sa Hulyo 22.

Kaaliw lang dahil nagpapalitan lang ng serye ang mag-dyowang Rayver at Janine dahil tanda namin ang Dragon Lady ang pumalit sa seryeng Asawa Ko, Karibal Ko na unang programa ng aktor sa GMA 7.

Anyway, wala kami sa presscon ng nasabing serye ng Siete kaya hindi namin alam kung umamin na si Rayver sa relasyon nila ni Janine.

FACT SHEET
ni Reggee Bonoan