HATAW! D'yaryo ng Bayan hatawtabloid.com
PAGKAGANDA-GANDA. Ito ang sabay-sabay na nabanggit ng mga nanood ng advance screening ng pinakabagong primetime crime-drama series na handog ng Dreamscape Entertainment Inc., ng ABS-CBN, noong Lunes ng gabi, ang Sino ang Maysala? Mea Culpa na pinagbibidahan nina Jodi Sta. Maria at Bela Padilla.
Ginagampanan ni Jodi ang karakter ni Fina, isang simpleng magsasakang naghahangad ng magandang kinabukasan para sa kanyang pamilya at buong tapang na hahanapin ang nawawalang anak.
Makakabangga niya si Bella, isang abogado, kasama sina Tony Labrusca, Kit Thompson, Sandino Martin, Ivana Alawi, at Ketchup Eusebio.
Magsisimula ang bangungot sa kanilang mga buhay nang mag-road trip ang magkakaibigang sina Juris (Bela), Andrei (Tony), Gaylord (Sandino), Greco (Kit), Lolita (Ivana), at Bogs (Ketchup) sa Baguio upang i-celebrate ang pagpasa sa bar.
Mauuwi ang okasyon sa isang aksidente at krimen na magdudulot sa pagkakalayo ni Fina mula sa kanyang bagong silang na anak. Ngunit dala ng konsensiya, magkakasundo ang magkakaibigan na kupkupin ang bata na siya namang aalagaan at kukupkupin ni Juris.
Susubuking itago ng barkada ang madilim na lihim ng kanilang nakaraan, hanggang sa madiskubre ang isang bangkay sa Baguio na ilang taon nang naaagnas.
Dahil sa balita, iigting ang paniniwala ni Fina na buhay pa ang kanyang anak at sisimulan ang paghahanap dito.
Lalo pang iinit ang kaso dahil sa paniniwala ni Fina na ang nawalay niyang anak ay nasa poder ni Juris. Hindi naman magpapatalo ang abogado laban sa akusasyon at panghahawakan ang pagmamahal para sa batang binuhay at binigyan niya ng magandang buhay.
Dito magtatagpo sina Fina at Juris at magkakaroon ng engkuwentro na mauuwi pa sa sampalan.
Siyempre hindi magpapatalo si Fina sa pagkuha ng katarungan laban sa mga bigatin at makapangyarihang abogado tulad ni Juris at mga kasamahan niya.
Kapuri-puri ang lahat ng nagsisiganap sa bagong teleseryeng ito na tiyak na kahuhumalingan na naman ng televiewers hindi lamang sa kakaiba at magandang istorya, kundi maging sa galing ng mga nagsisiganap. Tulad na hindi matatawaran ang galing ng bawat isa.
Kasama rin sa cast ng Sino Ang Maysala?: Mea Culpa ang mga batikang aktor na sina Agot Isidro, Janice de Belen, Ayen Munji-Laurel, Jay Manalo, Allan Paule, at Boboy Garovillo. Ito ay idinirehe nina Andoy Ranay at Dan Villegas at mapapanood na simula Lunes, Abril 29.
SHOWBIZ KONEK
ni Maricris Valdez Nicasio
