HATAW! D'yaryo ng Bayan hatawtabloid.com
AMINADO kapwa sina Rufa Mae Quinto at Ynez Veneracion na mahirap na masarap maging ina. Kapwa rin nila sinabing kakaiba ang sayang naibibigay ng pagiging ina sa kanila.
Nakasalubong namin at ng ibang entertainment press si Rufa Mae noong Martes ng gabi sa ELJ building, karga-karga ang anak na si Athena Alexandria Magallanes at kinumusta siya ni Jerry Olea ukol sa pagiging ina bilang malapit na rin ang Mother’s Day (sa Linggo, Mayo 13).
Aniya, napakasarap maging ina. “Enjoy na enjoy ako. Ang sarap-sarap pala na hindi mo ma-explain.”
Kaya naman susundan pa niya si Athena sa susunod na taon dahil hindi naman siya nahirapan sa panganay niya dahil mabait at bibo ito.
Enjoy din sa pagiging ina si Ynez na nakausap namin noong Miyerkoles ng tanghali sa mediacon ng Ignite concert presscon ni Regine Tolentino na gaganapin sa May 26 sa SM Skydome.
Isa sa guests si Ynez at sinabing dapat abangan at panoorin ang Ignite cance concert dahil ipakikita nila roon ang women empowerment ganoon din ang mga napaka-seksi nilang costume.
Ukol naman sa pagiging ina, aminado itong mahirap na masarap pero marami ang nabago sa kanya simula nang maging ina siya.
Aniya, naging responsable siya sa buhay at mas inuuna ang anak kaysa sarili.
Very proud din siya sa anim na taong gulang niyang anak na matalino at magaling sa Ingles dahil sa Assumption iyon nag-aaral.
Kina Rufa Mae at Ynez, sumasaludo kami sa kanila gayundin sa mga iba pang nanay. Binabati rin namin ang lahat ng mga ina ng Happy Mother’s Day.
SHOWBIZ KONEK
ni Maricris Valdez Nicasio
