Call center agent patay sa cement mixer

PATAY ang isang call center agent nang mabangga at maka-ladkad ng isang cement mixer ang sinasakyang motorsiklo kahapon ng madaling araw sa San Andres Bukid, Maynila.

Sa ulat ni Supt. Jerry Corpuz, OIC station commander ng Manila Police District Sta. Ana Station (MPD-PS6), kinilala ang biktimang si Joshua Mari Webb, 24, residente sa Gonzales St., Malate, Maynila.

Sa imbestigasyon ni PO2 Isagani  Sabrine, naganap ang insidente dakong 3:05 am sa Osmeña Highway sa kanto ng San Andres St., San Andres Bukid.

Binabagtas ng biktima ang nasabing lugar lulan ng motorsiklo nang mabangga siya ng cement mixer (AGA 9344) na minamaneho ni Mario Lamigas, 46, ng Peakson Mia East Road, Tikling, Taytay, Rizal.

Pumailalim ang biktima at nakaladkad ng cement mixer na nagresulta sa agaran niyang kamatayan.

Tinangkang tumakas ng suspek ngunit naaresto sa Pedro Gil St., kanto ng Tejeron Street sa Sta. Ana, Manila.

(LEONARD BASILIO)