Sino ang bagyong ‘ninong’ ni Supt. Marvin Marcos na nag-utos kay Gen. Bato para ibalik sa PNP-CIDG 8?

INIUUGOY tayo sa ‘teleserye’ ng imbestigasyon sa Senado kaugnay ng paspaslang kay Albuerra mayor Rolando Espinosa Sr., ang tatay ng sinasabing drug lord na si Rolando “Kerwin” Espinosa Jr.

Sa isang press conference na ginanap sa Quezon City Police District (QCPD) headquarters, ibinunyag ni PNP chief, Dir. Gen. Ronald “Bato” Dela Rosa, isang mataas na opisyal ng gobyerno ang tumawag at nag-utos sa kanya para ibalik si Supt. Marvin Marcos sa CIDG Region 8 mula sa CIDG Region 9.

Naganap ‘yan bago ang kontorbersiyal na pagkakapaslang kay Mayor Espinosa sa Baybay jail sa Baybay, Leyte.

Ibinunyag kaya ito ni Gen. Bato dahil ang ibig sabihin, kung pinangatawanan niya na huwag ibalik sa CIDG Region 8 si Kernel Marcos ay hindi magaganap ang kontrobersiyal na pamamaslang sa tatay na Espinosa?

Si Mayor Espinosa ay itinuturing na ‘malaking tertimonya’ para maugat ang operasyon ng narco-politics sa bansa na kung saan-saan na ito nagsanga at kung sino-sinong politiko na ang nakikinabang.

Pero pinaslang nga siya ng yunit ni CIDG Region 8 chief, Supt. Marcos habang nakakulong sa Baybay jail.

Ang tanong ngayon, sino ba ‘yang nag-utos kay Gen. Bato na ibalik sa Region 8 si Marcos?

Sino bang taga-itaas ‘yan?

Taga-2nd floor ba ‘yan? Taga-3rd floor o baka naman skyscraper ‘yang taas na ‘yan?!

Mataas as in matangkad ba ‘yan!?

Sa Lunes, uupo si Gen. Bato sa isinasagawang imbestigasyon ng Senado.

Dito kaya isiwalat ni Gen. Bato kung sino ‘yang taga-itaas na ‘yan?!

Karapatan ng taongbayan na humahanga kay Gen. Bato na malaman kung sino ba ‘’yang ‘call a friend’ ni Kernel Marcos!

Mga suki, abangan po natin at tutukan kung ano ang magaganap sa Lunes sa ‘teleserye’ ng sambayanan.

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com

BULABUGIN
ni Jerry Yap