Nagkakanlong kay Dayan binalaan ng NBI

NAGBABALA ang National Bureau of Investigation (NBI) sa mga nagkakanlong sa dating karelasyon at driver/bodyguard ni Senador Leila de Lima na si Ronnie Dayan.

Ayon kay NBI Spokesperson Ferdinand Lavin, si Dayan ay may kinakaharap na arrest order mula sa Kamara at sentro ng kontrobersiya na may kinalaman sa droga.

Kaya ang mga nagkakanlong sa kanya ay posibleng maharap sa problemang legal.

Kasabay nito, sinabi ni Lavin, tatlong tracker team ng NBI ang tumututok sa paghahanap kay Dayan.

Nakatulong aniya ang paglalabas ng reward money ng VACC dahil dumami ang mga nagbibi-gay sa kanila ng impormasyon, ngunit malaking hamon ang pagsala sa natatanggap na mga impormasyon.

Naniniwala si Lavin, nasa Filipinas pa si Dayan at nagpapalipat-lipat lamang ng lugar sa Luzon. Ngunit tumanggi siyang magbigay ng detalye dahil iniiwasan nilang masunog ang operasyon at masabotahe ang mga impormante na nakikipag-ugnayan sa kanila.

( LEONARD BASILIO )