Pagbabago sa sistema ng gobyerno, paiigtingin ng Hugbong Federal

ISINULONG na ng  Hugpong Federal Movement of the Philippines (HFMP) ang pagkilos sa sabay-sabay na rally sa Luzon, Visayas at Mindanao nitong Linggo upang tahakin ang pagtatatag ng Federal Republic of the Philippines sa liderato ni Pangulong Rodrigo Duterte.

Sa rally na ginanap sa Quirino Grandstand sa Rizal Park sa Maynila, sinabi ni HFMP founder at national chairman Celso Tizon na halos 100 taon na nating ginagamit ang kasalukuyang sistema ng gobyerno pero patuloy lamang nababaon sa kahirapan ang ating bansa at napag-iiwanan ang malalayong lalawigan na hindi napapansin ng sentro ng gobyerno sa mga kalunsuran.

Sinabi ni PDP Laban Policy Studies Group founder at head at HFMP director for Luzon, Business Sector Jose Antonio Goitia na  “centerpiece” ng programa sa pagbabago ng PDP Laban mula pa noong itinatag ang partido para maging sistemang Federal ang ating bansa.

“Layunin nito na tuluyang baguhin at paunlarin ang pangkalahatang kapakanan ng buong bansa sa pagbabawas ng labis na kapangyarihan ng “central government” sa larangan ng pamamahala at pananalapi, at ilipat ang karamihan sa mga kapangyarihang ito sa binaha-bahaging rehiyon na makikilala bilang Federal states,” ani Goitia.

“Sila na ang mamamahala sa kanilang estado na hindi na masyadong pakikialaman ng central government, taliwas sa kalakaran ng kasalukuyang ‘unitary system’.  Kaya hiling ko na makilahok tayo, matamang makinig at limiin ang diwa ng Federalismo sa mga ginaganap na pagmumulat ukol dito na walang humpay na ginagampanan ng HFMP at PDP Laban sa buong bansa.”

“Sa Luneta natin sadyang ginanap  ang pagtitipon nating ito hindi dahil sa lawak kundi dahil ito ay makasaysayan. Naging larangan ito ng mga madugong pagkilos kontra sa dominasyon ng mga banyagang lahi, Espanyol, Amerikano, at Hapones,  na nanakop sa atin.  Kaya angkop lamang na dito natin ipahayag ang ating suporta sa pinakamahalagang programa ng ating Pangulong Rodrigo Roa Duterte. Asahan natin na sa bigkis ng ating pagkakaisa, mapagtatagumpayan nating maitatag ang bagong Federal Republic of the Philippines,” dagdag ni Goitia.

Sinabi ng isa pang opisyal ng HFMP na si Bishop Don Loayon, halos isang milyon na ang volunteers ngayon na nagsusulong ng Federalismo sa buong bansa kaya kasabay ng rally sa Maynila ang mga pagtitipon din sa mga lungsod ng Davao, Gen. Santos, Cotabato, Butuan. Zamboanga, Kidapawan, Bacolod, Iloilo at sa lalawigan ng Palawan.