2 Chinese drug lord napatay sa Cauayan shabu lab

CAUAYAN CITY, Isabela – Itinuturing ni Philippine National Police (PNP) Chief Ronald dela Rosa, big time drug lord ang dalawang napatay na Chinese sa raid sa shabu laboratory sa isang warehouse sa District 1, Cauayan City nitong Linggo ng hapon.

Pinangunahan ng PNP chief ang press conference dakong 8:00 am kahapon sa mismong gusali na kinatagpuan sa shabu laboratory.

Ayon kay Gen. dela Rosa, maituturing na big time drug lord ang mga napatay na sina Jixin Li Huang alyas Kim Punzalan Uy at She Cangbo dahil mayroon silang shabu laboratory.

Pinabulaanan niya na pasalubong ang isinagawang operasyon ng PNP sa pagdalaw sa Isabela ni Pangulong Rodrigo Duterte dahil nasa Ilocos na ang Pangulo nang i-report niya ang pagsalakay sa shabu laboratory.

Samantala, muling sinabi ni PDEA deputy director for operations Ricardo Quinto, wala pang finished product na nakuha sa bodega dahil nagsasagawa pa lamang ng testing ang dalawang napaslang.

Iimbestigahan din nila ang may-ari ng bodega na si dating Mayor Manuel Tio.

Samantala, inamin ni dating Mayor Manuel Tio na pag-aari niya ang bodega na inuupahan ni Kim Uy ng 40,000 kada buwan.

Dati aniyang palay buying station ang gusali ngunit binitawan niya ang negosyo sa Cauayan City nang maging lokal na opisyal ng Luna, Isabela.

Sinabi ni Tio na nakilala niya si Uy noong 2009 sa pamamagitan ng isa pang Chinese na si Edward Uy.

ni  FIDEL COLOMA