Walang sex video – Koko

MAGING ang alyado ni Pangulong Rodrigo Duterte na si Senate President Aquilino “Koko” Pimentel III ay duda kung totoo ang sinasabing sex video ni Senador Leila de Lima at driver ng senador.

“Actually, I believe that there is no video. There is no actual video. Some have shown me a video but it does not involve any member of the Senate. It is a sex video but it does not involve a member of the Senate,” pahayag ni Pimentel nitong Martes sa plenaryo.

Ayon kay Pimentel, tiniyak din sa kanya ni House Speaker Pantaleon Alvarez, walang sex video na ipalalabas kapag ipinagpatuloy ng Kamara ang pagdinig tungkol sa sinasabing drug trade sa loob ng New Bilibid Prison na iniuugnay si De Lima at dati niyang driver na si Ronnie Dayan.

Una rito, sinabi ni Alvarez, wala siyang nakikitang masama kung ipalabas sa komite ang sinasabing sex video nina De Lima at Dayan.

Iginiit noon ni Justice Secretary Vitaliano Aguirre II, dapat maipalabas ang sinasabing sex video para maipakita ang relasyon ni De Lima kay Dayan, na kumukobra ng pera sa ilang bilanggo sa NBP.