8-anyos B’laan patay sa kalaro (Akala’y toy gun)

DAVAO CITY – Patay ang 8-anyos batang B’laan na naglalaro ng baril-barilan sa kamakalawa sa Datal Detas, Kolonsabak, Matanao, Davao del Sur.

Kinilala ang biktimang si Joel Lasib, naninirahan sa nasabing lugar.

Napag-alaman sa imbestigasyon ng pulisya, nangyari ang insidente dakong 11:00 am. habang naglalaro ang biktima kasama ang kanyang mga kapatid, pinsan at mga kapitbahay.

Ayon sa ulat, kumuha ng .22 kalibre ng baril sa kanilang bahay ang pinsan ng biktima na si alyas Jong-jong at tinutukan sa ulo si Lasib.

Ngunit pumutok ang baril at tinamaan ang biktima sa noo at tumagos ang bala sa likurang bahagi ng kanyang ulo.

Naglunsad ng imbestigasyon ang Matanao Police, ngunit agad pumagitna ang tribal leaders upang patuloy na mangingibabaw ang kapayapaan sa kanilang lugar.

Sinasabing hindi alam ng kalaro na tunay na baril ang ginamit sa baril-barilan.

Iniimbestigahan pa kung sino ang nagmamay-ari sa baril.