Ilang pasyente ng MMC nangamba sa Bilibid riot victims

NANGANGAMBA ang ilang pasyente ng Muntinlupa Medical Center sa pagkakaratay ng sugatang tatlong high profile inmates ng New Bilibid Prison (NBP) makaraan ang nangyaring riot sa nasabing piitan kamakalawa.

Halos sabay na nagpalipat ng silid ang ilang pasyente na katabi ng silid ng tatlong bilanggo na sina Jaybee Sebastian, Peter Co, at Vicente Sy.

Nananatiling bukas ang mga pintuan ng nasabing inmates at maraming bantay na Special Action Force (SAF) sa lahat ng pasilyo.

Magkakatabi ang kuwarto ng NBP inmates na todo bantay at hindi basta-basta makalalapit ang sino man sa pintuan.

Ayon kay Dr. Uriel Halum, administrator ng MMC, limitado sa apat na bisita ang pinahihintulutan na kamag-anak ng mga bilanggo.

Mahigpit ang ipinatutupad na seguridad kaya maging ang mga kamag-anak ng inmates ay kinakailangan munang humingi ng permiso mula sa NBP.

( JAJA GARCIA )