HATAW! D'yaryo ng Bayan hatawtabloid.com
TARAY ni Kiray dahil may say siya kung sino-sinong leading man ang gusto niyang makasama sa mga pelikulang gagawin niya sa Regal Entertainment. Nauna na rito sina Derek Ramsay para sa Love Is Blind at Enchong Dee sa I Love You To Death na mapapanood na sa Hulyo 6 mula sa direksiyon ni Miko Livelo.
Isa sa mga kahilingan at pangarap ni Kiray ay ang long time crush niyang si Sam Milby na hindi malayong mangyari dahil may options naman ang aktor na gumawa ng pelikula outside Starcinema.
Kumita ang pelikula nina Sam at Jennylyn Mercado sa Regal Entertainment na may titulong The PreNup na idinirehe ni Jun Lana.
Nabanggit na raw ni Kiray kay Mother Lily Monteverde si Sam at hoping na puwede ang aktor na busy ngayon sa tapings ng seryeng Doble Kara.
“Alam naman ng lahat na crush ko si Sam, inaamin ko naman ito noon pa, vocal talaga ako kung sino crush ko. Kaya sana makasama ko siya (Sam),” saad ni Kiray.
Sa nakaraang presscon ng I Love You To Death ay naihambing si Kiray kay Jennylyn kaya natanong ang komedyana kung ang GMA actress ang peg niya na pawang guwapo ang leading man?
Sabi ni Kiray, “oo nga may nagtanong sa akin niyan, parang si Jennylyn daw ang peg ko, parang ang layo ko naman kay Jen. Ang dami na niyang napatunayan.
“Wala akong peg, gusto ko sarili ko lang, wala akong gustong sundan pero ang idolo ko sa pagiging komedyana ay sina Eugene Domingo at Ai Ai de las Alas.
“Pero hindi ko sila gustong sundan kasi hindi ko sila masusundan kahit anong mangyari, hindi ko kaya ‘yun, gagawin ko ang lahat para sa akin, gusto ko makilala ako bilang Kiray Celis hindi dahil peg ko si Eugene o si Ai Ai.”
FACT SHEET – Reggee Bonoan
